Faustino Aranzabal: "Marixe panpinen baleta" ikuskizuneko zuzendaria.

"Haurrekin erreakzioa zuzena da, gustatzen bazaie berehala nabaritzen da."

Ia hiru urtetan Euskal Herriko antzoki sare osoan izan da Kresala dantza taldearen ikuskizuna. Txotxongiloak, elementu magikoak, gizakiak... guztiak bat eginda Ortzadarraren zazpi koloreak berreskuratzeko lanean. Berrogeita hamar lagun lanean, dantzariak, titiriteroak, antzerki mundutik etorritako lagunak, musikariak... guztiak bat eginda familia osoarentzat egindako ikuskizunean. Hori bai, oinarrian etxeko txikienak, haurrak gogoan hartuz egin zen baina helduei ere izugarri gustatzen zaie Markos eta Kattalin panpinen abentura.

Nola definituko zenuke "Marixe" ikuskizuna?

"Marixe, panpinen baleta" dantza eta txotxongiloen mundua lotzen dituen ikuskizuna da. Psikodrama bat da. Haurrentzat oso modu erakargarrian eskainitako lana da. Hartzak, zangoak, ardiak, azeriak... pertsonaia ugari agertzen da.

Zer kontatzen da "Marixe, panpinen baletan"?

Fabula bat da. Irudimenezko leku batean kokatu dugu. Leku horretan Ortzadarra desagertu da eta bi protagonistek, Markos eta Kattalinek, beste hainbat pertsonaiek lagundurik kolore guztiak banan-banan eskuratu beharko dituzte. Guztiak eskuratutakoan, Ortzadarra berreskuratuko dute.

Zergatik "Marixe" izena? Nondik dator?

"Marixe" elementu magiko bat da. Mari bat izango balitz bezela. Protagonistak panpinak dira; Markos eta Kattalin. Ikuskizunean zehar pertsonaia bizi bihurtzen dira; eta, horiez gainera, gorputza duten gizakiak ere badaude, protagonistei laguntzen.

Zenbat lagunek osatzen duzue "Marixe,panpinen baleta" ikuskizuna?

Guztira berrogeita hamarren bat gara. Ikuskizuna familia osoarentzat dago pentsatuta. Partaide gehienak helduak gara, baina une jakin batean dantza eskolako ikasle batzuek, haur batzuek ere parte hartzen dute. Hiru belaunaldi daude Marixe ikuskizunean, bizitzak dituenen ispilu : haurtzaroa, gaztaroa eta zahartzaroa.

Nola sortu zen ikuskizuna egiteko ideia?

Ni dantza irakaslea naiz. Ikusten ari nintzen helduentzat egiten zirela beti gauzak, eta ez oso modu erakargarrian, gainera, nire iritzian. 1999. urtean prestatzen hasi ginen, noraino iritxiko ginen ejakin gabe eta 2001. urtean ikuskizuna osatzen ari ginela ikusi genuen. 2002. urtean estreinatu genuen eta ordudanik urtean hamar-hamabi emanaldi ari gara ematen. Kresala dantza taldea ikuskizun honetan zentratuta dago. Ezinezkoa da momentu berean hiru ikuskizun batera eskeintzea. Patxadaz hartu behar da, hamarkada batean bi lan egiteko denbora ematen du. Beno, nire iritzian behintzat.

Zer diote haurrek ikusle diren aldetik?

Donostian estreinatu genuenean izugarria izan zen. Ikuskizuna sei urtetik gorakoentzat da. Baina haur hezkuntzako haurrak, lau urtekoak eraman zituzten. Eta oso ongi pasatu zuten, arreta handiz jarraitu zuten dena. Ikuskizuna oso bisuala da, oso modu arinean eta jarraian dago eginda.

Ainhoa Mendiburu